सौगात विष्ट
ताप्लेजुङ, कात्तिक ५ गते । नेपाल भाषा तथा सांस्कृतिक समाज ताप्लेजुङले नेपाल सम्वत् मनाएको छ । नेपाल सम्वत् ११४६ को स्थापनाको अवसरमा शुभकामना आदान प्रदानको कार्यक्रम आयोजना गरी स्थापना दिवस मनाएको हो ।
कार्यक्रमको आयोजना नेपाल भाषा तथा सांस्कृतिक समाजको भवन भिन्तुना डाँडामा गरिएको थियो । ११४६ वर्ष अगाडि राजा रागवदेवको शासनकालमा शंखधर साख्वाःले गरिबी र ऋणमा डुबेका नागरिकहरूको ऋण विमोचन गरी ऋणको भारबाट पीडित जनतालाई मुक्त गर्ने ऐतिहासिक निर्णय गरेको दिन देखि नेपाल संवतको शुभारम्भ भएको थियो ।
सोही अवसरमा प्रत्येक वर्ष बिभिन्न कार्यक्रम गरि मनाउँदै आइरहेको नेपाल भाषा तथा सांस्कृतिक समाज ताप्लेजुङका अध्यक्ष शंकर श्रेष्ठले जानकारी दिनुभयो । यस्तै दिवसको अवसरमा दिउँसो लाखे नाच समेत देखाइएको थियो । लाखे नाचलाई र्याली सहित फुङलिङ बजार परिक्रमा गरिएको थियो । साथै साँझ म्ह पुजा गरिएको अध्यक्ष श्रेष्ठको भनाइ छ ।
कार्यक्रममा फुङ्लिङ नगरपालिकाका प्रमुख अमिर मादेन, उपप्रमुख भिमादेवी ओझा, बिभिन्न सुरक्षा निकायका प्रमुख, सञ्चारकर्मी र स्थानीयहरुको सहभागी रहेको थियो ।
प्रतिक्रिया