ताप्लेजुङमा स्थायी नियुक्तिका लागि स्थानीय तह छनोट गर्न शिक्षकहरुलाई सात दिनको म्याद

ताप्लेजुङ । ताप्लेजुङमा प्राथमिक तह तृतीय श्रेणीमा स्थायी नियुक्तिका लागि सिफारिस भएका शिक्षकहरूले अध्यापन गर्न चाहने स्थानीय तह सात दिन भित्र छनोट गर्नु पर्ने भएको छ । स्थायी नियुक्तिका लागि सिफारिस भएर आएका १ सय ४ जना शिक्षकहरूले स्थानीय तह छनोट गर्नु पर्ने भएको हो ।

शिक्षकहरूले चैत १ गतेका मितिले ७ दिन भित्रमा स्थानीय तह छनौट गरिसक्नु पर्ने शिक्षा विकास तथा समन्वय इकाई ताप्लेजुङका प्रमुख युगमणि सवेहाङले बताउनुभयो । उहाँका अनुसार सिफारिस भएर आएका मध्ये सबैभन्दा बढी २३ जना सिरिजङ्गा गाउँपालिकामा नियुक्ति हुने भएका छन् । यस्तै सबैभन्दा कम ४ जना फुङलिङ नगरपालिकामा नियुक्ति हुने भएको छ ।

आठराई त्रिवेणी गाउँपालिकामा १५ जना, पाथीभरा याङवरक गाउँपालिका र फक्ताङलुङ गाउँपालिकामा १४–१४ जना, मिक्वाखोला गाउँपालिकामा १२ जना, मेरिङदेन गाउँपालिकामा १० जना, सिदिङ्वा गाउँपालिकामा ७ जना र मैवाखोला गाउँपालिकामा ५ जना नियुक्ति हुने भएको शिक्षा विकास तथा समन्वय इकाई ताप्लेजुङले जनाएको छ ।