खेबाङ गोल्डकपको सातौँ संस्करण कात्तिक १० देखि, विजेताले १ लाख ५१ हजार १११ पाउने

साहारा लङ्वा लिम्बू

ताप्लेजुङ । ताप्लेजुङको सिरिजंघा गाउँपालिकामा खेबाङ गोल्डकपको सातौँ संस्करण सञ्चालन हुने भएको छ । आगामी कात्तिक १० गतेदेखि १६ गतेसम्म उक्त गोल्डकपको संस्करण सञ्चालन हुने भएको हो । 

खेबाङ स्पोर्टिङ क्लवले शुक्रबार फुङलिङ सदरमुकाममा पत्रकार सम्मलेनको आयोजना गर्दै सिरिजंघा गाउँपालिका ७ खेबाङमा प्रतियोगिता सञ्चालन गर्ने तयारी भइरहेको जानकारी गराएको छ ।

क्लबका अध्यक्ष बिनम माबोका अनुसार प्रतियोगितामा जिल्ला बाहिरका नेपाल पुलिस क्लब कोशी प्रदेश, रेड स्टार फुटबल क्लब झापा र कुम्मायक गाउँपालिका पाँचथरले सहभागिता जनाउनेछन् । बाँकी ताप्लेजुङका तेल्लोक स्पोर्टिङ क्लव तेल्लोक, लालीगुराँस स्पोर्टिङ क्लब सुरुम्खिम, नैना कम्पनी प्रालि खेबाङ, पेदाङ स्पोर्टिङ क्लब पेदाङ र आयोजक खेबाङ स्पोर्टिङ क्लवले प्रतिष्पर्धा गर्नेछन् ।

प्रतियोगिताको विजेताले १ लाख ५१ हजार १ सय ११ रुपैयाँ र उपविजेताले १ लाख १ हजार १ सय ११ रुपैयाँ सहित ट्रफी, मेडल र प्रमाण पत्र प्राप्त गर्नेछन् । यस्तै गोल्डकपमा बिभिन्न विधामा उत्कृष्ट हने खेलाडीलाई समेत उचित नगद पुरस्कारको ब्यवस्था गरिएको आयोजकले जनाएको छ ।

प्रतियोगिता सम्पन्न गर्नका लागि करिब १५ लाख रुपैयाँ लागत लाग्ने आयोजकको अनुमान रहेको अध्यक्ष माबोको भनाई छ ।