साहारा लङवा लिम्बू
ताप्लेजुङ । अन्तर्राष्ट्रिय रेड पाण्डा ट्रेल म्याराथन प्रतियोगिताको उपाधि विशाल राईले हात पार्नु भएको छ । हिमाली संरक्षण मञ्च ताप्लेजुङको आयोजनामा सञ्चालन भएको उक्त प्रतियोगिताको उपाधि पाँचथरका विशालले हात पार्नु भएको हो ।
विश्व रेड पाण्डा दिवसको अवसरमा आज सञ्चालन भएको प्रतियोगिताको उपाधि सँगै राईले नगद एक लाख रुपैयाँ प्राप्त गर्नु भएको छ । यस्तै पुरुष तर्फको प्रथम भने बझाङका करण रावल हुने भएको छ उहाँले ५० हजार रुपैयाँ प्राप्त गर्नुभएको आयोजकले जनाएको छ ।
यस्तै पुरुष तर्फको दोस्रो फक्ताङलुङका रमेश लिम्बू हुनुभएको छ भने तेस्रो सोलुखुम्बूका अर्जुन राई हुनुभएको छ । उहाँहरूले क्रमश ३० हजार र २० हजार रुपैयाँ सहित प्रमाण पत्र प्राप्त गर्नु भएको छ । विश्वमै लोपोन्मुख अवस्थामा रहेको रेड पाण्डा (हाब्रे)को संरक्षण र संरक्षणको महत्व, पर्यटन प्रबर्द्धन, स्थानीय अर्थतन्त्रको सुदृढीकरणका लागि म्याराथनको आयोजना गरिएको हो ।
म्याराथनको दुरी ताप्लेजुङको सदरमुकाम फुङलिङ बजारको तोक्मेबाट ३ हजार ७ सय ९४ मिटरको उचाइमा रहेको प्रसिद्ध धार्मिक स्थल पाथीभरा धामसम्म पुगेर पुन फुङलिङ बजारको तोक्मेसम्मकै करिब ४८ किलोमिटरको रुट निर्धारण गरिएको थियो । पाथिभरा क्षेत्रमा रेडपाण्डाको बासस्थान भएकाले समय–समयमा तीर्थयात्रीले समेत रेड पाण्डा भेट्ने गरेका छन् ।
प्रतिक्रिया