सिराहा ताप्लेजुङ गोल्डकपको फाइनलमा प्रवेश 

ताप्लेजुङ । सिराहाको सलहेश युवा क्लब ताप्लेजुङमा जारी अन्तर्राष्ट्रिय आमन्त्रण दोश्रो ताप्लेजुङ गोल्डकपको फाइनलमा प्रवेश गरेको छ । आज भएको अन्तिम सेमिफाइनल खेलमा ट्राइबेकरमा ४-३ गोल अन्तरले झापाको बिर्तामोड फुटबल क्लब पराजित गर्दै सिराहा फाइनलमा प्रवेश गरेको हो । 

यो सँगै फाइनलका लागि सिराहाले मोरङको सगरमाथा युथ क्लब सँग भेट पक्का गरेको छ । निर्धारित समयमा दुवै टिमबाट एक एक गोलको बराबरी भए पछि खेल ट्राइबेकरमा धकेलिएको थियो ।

झापाले त्रिभुवन आर्मीलाई र सिरहाले पाँचथरलाई पराजित गर्दै सेमिफाइनलमा प्रवेश गरेको हो । हिजो भएको पहिलो सेमिफाइनल खेलमा ताप्लेजुङको संघर्ष स्पोर्टिङ युवा क्लबलाई २–१ ले पराजित गर्दै मोरङ फाइनलमा प्रवेश गरेको हो । 

भदौ १० गते हुने फाइनल प्रतियोगिताको विजेताले ५ लाख र उपविजेताले २ लाख ५० हजार ५ सय ५५ रुपैयाँ सहित ट्रफी, मेडल र प्रमाण पत्र प्राप्त गर्ने छन् ।