ताप्लेजुङ । अन्तर्राष्ट्रिय आमन्त्रण ताप्लेजुङ गोल्डकपको दोश्रो संस्करण आजबाट सुरु हुँदैछ । भाद्र १० गतेसम्म जारी रहने प्रतियोगिताको उद्घाटन आज हुँदैछ ।
लाखेजात्रा पर्वको अवसरमा लाखेजात्रा सञ्चालन समितिद्वारा भानु जन माध्यमिक विद्यालयको प्राङ्गणमा आयोजित खेलमा ताप्लेजुङका एक सहित ८ ओटा टिमले सहभागिता जनाउँदैछन् । सहभागी टिमहरू ४ ओटा प्रदेशका ७ र बाँकी एउटा भारतको क्लब रहेका छन् ।
आज हुने उद्घाटन खेलमा जिल्लाको प्रतिनिधित्व गर्दै संघर्ष स्पोर्टिङ युवा क्लब ताप्लेजुङ र कञ्चनजङ्घा फुटबल क्लब सिलगुडी भारतले प्रतिष्पर्धा गर्दै छन् । उद्घाटन खेलमा संघर्षले अन्तर्राष्ट्रिय टिमसँग प्रतिष्पर्धा गर्नुपर्दा अत्यन्तै चुनौतीको सामना गर्नुपर्ने जिल्लावासीले अनुमान गरेका छन् । तर ताप्लेजुङतर्फका क्लबमा समेत अब्बल र अनुभवी खेलाडीहरू भएकाले प्रतिस्पर्धात्मक ढङ्गले मात्रै हारजित हुने सम्भावना रहेको संघर्ष स्पोर्टिङले बताएको छ ।
भारततर्फका टिममा समेत विगत लामो समयअगाडिदेखि खेलमै व्यस्त रहेका खेलाडीहरू भएकाले आजको खेलबाट बिजयी सुरुवात गर्दै सेमिफाइनल प्रवेश गर्ने योजनाका साथ मैदान उत्रने तयारीमा रहेको छ । आजको खेलमा विजेता बन्ने टिमले भाद्र ५ गते हुने रूपन्देही र मोरङबीचको बिजेतासँगको भेट पक्का गर्नेछ ।
यस्तै भोलि छिमेकी जिल्ला पाँचथर र सलहेश युवा क्लब सिरहाबीचको खेल हुनेछ । प्रतियोगिताको विजेता नगद ५ लाख उपविजेताले २ लाख ५० हजार ५ सय ५५ रुपैयाँ सहित ट्रफी, मेडल र प्रमाण–पत्र प्राप्त गर्ने भएका छन् । खेलका विभिन्न विधामा उत्कृष्ट बन्ने खेलाडीलाई समेत उचित पुरस्कारको ब्यवस्था गरिएको आयोजकले जनाएको छ ।
क्वाटर फाइनलका चारओटा खेलमा प्रत्येक दिन १ सय रुपैयाँ टिकटको ब्यवस्था गरिएको छ । सेमिफाइनलमा २ सय र फाइनलमा २ सय ५० रुपैयाँका दरले टिकटको ब्यवस्था गरिएको हो । गोल्डकप सम्पन्न गर्न विभिन्न चुनौतीका बावजुत दर्शकका सुविधाका लागि अस्थायी प्याराफिट समेत निर्माण गरिएको छ । सो कारण सबै दर्शकले टिकट काटेर खेल अवलोकन गरि सहयोग गरिदिनुहुन आयोजकले आग्रह गरेको छ ।
प्रतिक्रिया