मैवाखोलाको मङ्मया खोलामा अवरुद्ध भएको सडक सुचारु 

ताप्लेजुङ । ताप्लेजुङको मैवाखोला गाउँपालिकाको मङ्मया खोलामा अवरुद्ध भएको सडक सुचारु भएको छ ।  गाउँपालिका केन्द्र साँघु र सदरमुकामसँग फुङ्लिङ जोड्ने मैवाखोला वडा न. २ र ३ को बिचमा पर्ने मङ्मया खोलामा अवरुद्ध भएको सडक तीन दिन पछि सुचारु भएको हो । 

साउन १६ गते राती आएको बाढीले खोला किनार आसपास सडकको भाग बगाउँदा सडक पूर्ण रुपमा अवरुद्ध भएको थियो । पालिकाको निरन्तर प्रयास पछि साउन १९ गते बेलुका तीन दिन पछि उक्त सडक सुचारु गर्न सफल भएको हो । 

खोलामा आएको बाढी पहिरोका कारण यो सडक सँगै पालिका केन्द्र सँग जोड्ने वडा न. ४, ५ र ६ को बाँकी सडकमा पनि सवारी साधन आवतजावत ठप्प भएको छ । अवरुद्ध सडकहरू खोलाउन केही समय लाग्ने मैवाखोला गाउँपालिकाका अध्यक्ष विजय वनेमले जानकारी दिनुभएको छ । 

अहिले बर्खा याम भएकोले पानी परि रहने भएका कारण खोलामा बाढी आइ रहने र बनाएको केही समयमै सडक पुन बाढीले बगाउने भएकाले अहिलेलाई खोला किनारमा अस्थाई बाटो निर्माण गरिएको उहाँले बताउनुभएको छ । उहाँका अनुसार पानी पर्न कम हुन साथ सबै अवरुद्ध सडकहरू क्रमश सुचारु गरिदै लगिने छ ।