ताप्लेजुङको मिक्वाखोलामा गोलिया ओसार पोसारमा रोक

ताप्लेजुङ । ताप्लेजुङको मिक्वाखोला गाउँपालिकाले गोलिया ओसार पसार गर्न रोक लगाएको छ । गाउँपालिकाले आज एक सूचना जारी गर्दै गाउँपालिका अन्र्तगत स्टक गरी राखिएको विभिन्न जातका काठका गोलिया ओसारपसार गर्न रोक लगाएको जनाएको छ । 

आगामी असार १ गतेदेखि अर्को सूचना जारी नभएसम्मका लागि रोक लगाइएको गाउँपालिकाका प्रमुख प्रशासकीय अधिकृत अर्जुनदेब योङ्या बताउनुभयो । वर्षातको समयमा ढुवानी तथा  ओसारपसार  गर्दा सडकहरू बिग्रिने, भत्किने भएकाले गोलिया ओसार पसारमा रोक लगाइएको उहाँले बताउनुभएको छ । 

रोक लगाइएको समयावधिमा गोलिया ओसारपसार गरेको पाइए नियन्त्रणमा लिई प्रचलित कानूनअनुसार कारबाहीको प्रक्रिया अगाडि बढाइने समेत गाउँपालिकाले जनाएको छ । गोलिया ओसारपसारमा पालिकाले रोक लगाएसँगै वर्षातको समयमा समेत सहज ढंगले साना सवारी साधनहरू सञ्चालन हुने स्थानीयले विश्वास लिएका छन् । 

 
यस अघि  सडकको अवस्था हेरी कतिपय गाउँपालिकाहरूले पनि गोलिया ओसारपसारमा रोक लगाउँदै आएका छन् ।