रेडियो काबेली
ताप्लेजुङ — ताप्लेजुङको दोभान बजारमा पुषे मेला स्वर्ण महोत्सवको अवसरमा आयोजित अन्रतजिल्ला पुरुष भलिबल प्रतियोगितामा बुधबार (आज) बाट सेमिफाईनल चरणका खेल सुरु हुने भएको छ ।
पहिलो सेमिफाइनल खेल पाथीभरा टाइगर भलिबल क्लब दमक र भोजपुर भलिबल क्लब भोजपुर बीच मध्यान्ह १२ वजे हुनेछ । दोस्रो खेल दिउँसो २ बजे आयोजक ताप्लेजुङको मुकेश मेमोरियल क्लब र सभापोखरी भलिबल क्लब संखुवासभा बीच हुने आयोजकले जनाएको छ ।
झापाको पाथीभरा टाइगर क्लब दमकले छिमेकी जिल्ला इलाम भलिबल क्लबलाई २५–१७, २५–१८ र २५–१८ सोझो सेटमा हराउँदै सेमिफाईनलमा आईपुगेको हो भने भोजपुर भलिबल क्लब भोजपुरले उदयपुर स्पोर्ट क्लब उदयपुरलाई २७–२९, २५–१८, २५–१५ र २७–२५ को अन्तरले हराउँदै सेमिफाईनल मा आईपुगेको हो ।
त्यस्तै मुकेश मेमोरियल क्लब ताप्लेजुङले भारत सिक्किमबाट आएको पाहुना टोली नाम्ची भलिबल क्लबलाई २५–१८, २५–२० र २५–१८ को सोझो सेटमा हराउँदै सेमिफाईनलमा आईपुगेको हो भने चर्चित भलिबल खेलाडी हिमाल सुनारी आबद्ध टिम तोक्पेगोला युथ क्लब ताप्लेजुङलाई २५–२१, २५–१८, १९–२५, २०–२५ र १५–१० को अन्तरले पराजित गर्दै संखुवासभा सेमिफाइनलमा पुगेको हो । फाइनल खेल बिहीबार हुने आयोजकले जनाएको छ ।
प्रतिक्रिया